💕🐴Rüebli etc. fürd Lilly🐴💕

Ich bin jetzt leider zweimal im Tierspital gsi, s 1. Mal zum Glück "nur" 4 Wuche, bim 2. Mal aber knapp 9...

Ich han äbe mit äre "Kollegin" Striit gha und sie häd mir öpis am Bei broche... S grosse Problem isch aber, dass dur das grad Chäferli ih mis Bei ine sind, darum hani drü Mal tüf und fescht müsse schlafe, dass die Lüt mit dä blaue Chleider öpis ah mim Bei händ chöne mache...

Es biisst mich so fescht under dem blöde Verband, woni sit Monate ah mim Bei han (jetzt wenigstens nur no dä Verband und nüme de Gips, dä isch no schlimmer gsi) - das macht mi amigs scho chli hässig 😠 Aber am schlimmschte isch gsi, dass ich bi de Behandlige vo mim Bei immer chli sediert worde bin (debi han ich immer fantastisch mitgmacht, das händ all gseit 😇) und ich nachher öpe ä Halbstund nüt han därfe frässe!! Dä doof Muulchorb, woni dänn han müsse ahlegge, hani würkli gar nöd luschtig gfunde. Chönder eu das vorstelle, wänn s Ässe vor eu staht und ihr nöd chönd ässe??

Bim erschte Mal sind die 4 Wuche ja ziemli schnäll verbigange - ich han nach 3 Wuche au eimal uh blöd tah, sodass mi viellicht au chli früehner gahlah händ 😉

S zweite Mal hani aber leider nöd so blöd chöne tue, willi mit äm Gips nöd guet han chöne umegumpe 😅 Mängisch hanis aber scho chli probiert, dänn häd dä Oberarzt amigs äs Öpfeli bracht - da bini uh froh gsi, will s Mami bringt viiiiel z wenig z Ässe (stelled eu vor, nur zwei Rüebli, äs Öpfeli, chli Fenchel und 2-3 sälbergmachti Guetzli pro Tag!!!). Die spinnt doch, findeder nöd au?

Im Video gsender, wie Hunger ich han!!

Jetzt bini zum Glück sit äm Fritig wieder dihei 😃 Ich han schön uf dä Oberarzt glost, wie immer, und bin grad sofort ih dere Nacht abgläge zum mini Bei z entlaste ☺️ Das häd scho guet tah, nach Monate wieder mal chöne abzligge 💆🏼‍♀️

Mini Bei (ja, jetzt sinds leider beidi Vorderbei, da ich s linke halt immer meh han müsse belaste, will s rächte weh tah häd) sind zwar nonig ganz gsund, aber hoffentli bald und dänn chani sälber in Migros ränne - okee, viellicht nonig grad so schnäll - und mir paar feini Sache go ussueche 😃 Darum sammli da chli Sackgäld, dass es nöd nur die wenige Sache vom Mami gid... 🙄😅